Balance económico celebración das Neves 2021

As contas presentan un importante beneficio que se empregará no ben común

Nas imaxes axuntas a este artigo podedes acceder ás contas da celebración  das Neves 2021, así como, ó listado de donativos da mesma. Tal e como se pode comprobar, estas arroxan un importante saldo favorable de 3.486,45 € que se ingresarán na conta bancaria da asociación de veciños para ser empregado o ben común da veciñanza.

Cando unha parroquia é tan unida como a nosa e os veciños creen nas cousas que se organizan, faise notar, e por iso se logrou xuntar a espectacular cifra de 6.926 € nun ano tan difícil coma este e despois de todo o acontecido o ano pasado no que houbo que cancelar a programación cultural prevista.

Por iso, dende a Xunta Directiva da Asociación de Veciños San Andrés de Zarracós queremos expresar o noso agradecemento:

• A todos os veciños desta parroquia pola súa excepcional colaboración, tanto económica como doutro tipo, máxime, nestes tempos tan difíciles que estamos a vivir.
• A todos aqueles veciños da parroquia, así como doutros lugares, que axudaron achegando diñeiro a maiores.
• A todas aquelas persoas que mercaron rifas para o sorteo de verán, así como, a aqueles que axudaron a vendelas de xeito totalmente desinteresado.
• A todas aquelas persoas que colaboraron para que a nosa Igrexa Parroquial lucise nas mellores condicións posibles.
• E por último, dun xeito moi especial, queremos transmitir o noso máis profundo agradecemento a: Antonio Gómez, Ana, Antonio Rodríguez, Nuria, Julita, Maricarmen, Vilanova e Marina. Sen a súa inmensa colaboración non houbese sido posible gozar da alborada deste ano, pois o imprevisto que se nos presentou na véspera, a piques estivo de tirar por terra todo o esforzo realizado nos últimos meses.

Dende a Asociación de Veciños agardamos que esta pequena celebración, cos seus erros e coas súas virtudes, fose do agrado da maioría e servise para romper un pouco coa tristura e coa monotonía dos últimos dous anos.

Ogallá o vindeiro ano volvamos á normalidade de verdade!!!