Un ano dende a colocación do contedor solidario e preto de 200 quilos de tapóns reciclados

Mil grazas a toda veciñanza da Broa pola inmensa solidariedade e participación

 

Nestes días ven de cumprirse un ano dende a instalación do contedor de tapóns solidario no campiño da Igrexa Parroquial de Zarracós e non podemos máis que agradecer a enorme implicación de toda a veciñanza pois recicláronse case que 200 quilogramos de tapóns de plástico, que se di pronto pero iso supón máis de 55.000 unidades. Así mesmo, tamén se evitou a emisión de 300 quilos de CO2 á atmosfera contribuíndo a coidar o noso planeta.

Pero, sen dúbida, o máis importante e que grazas ó pequeno xesto que supón reciclar tapóns dende a Fundación SEUR puideron axudar a nenos e nenas a mellorar notablemente a súa vida.  Por exemplo, a mediados de xuño deste ano 2021,  eran 5 nenas e nenos os beneficiarios do proxecto “Tapones para una nueva vida” o que supuxo  38.000 euros en axudas obtidos da reciclaxe de 23 toneladas de tapóns.

Unha vez máis, dende a asociación de veciños queremos expresarvos o noso agradecemento e animarvos a que sigades reciclando tapóns!!