A VII Olimpíada Rural da Broa arrancou en Zarracós cunha xornada de balonmán

Celebrada na tardiña do 5 de agosto de 2025

A primeira xornada da VII Olimpíada Rural da Broa celebrouse o pasado martes, día 5 de agosto, no campo da festa de Zarracós, e nela xuntáronse máis de vinte e cinco cativos e cativas da zona con ganas de gozar do deporte e compartir unha tarde chea de diversión.

Do mesmo xeito que o ano pasado, o balonmán foi o deporte estrela da xornada, acompañado de xogos variados que fixeron rir e participar tanto a pequenos como a maiores.

Unha vez rematadas as probas deportivas, a rapazada puido repoñer forzas cunha merenda preparada pola organización no local sociocultural: sándwichs, froita, zumes e auga para todos e todas.

Dende a organización agardamos que esta primeira cita da Olimpíada resultase do agrado de participantes e público. Animámosvos tamén a achegarvos ás tres xornadas restantes, que este ano terán lugar en Entrambosríos, Olás e Corvillón. Aproveitamos a ocasión para agradecer unha vez máis o traballo altruísta e imprescindible dos monitores e monitoras que fan posible esta actividade. Tamén queremos dar as grazas ao Concello da Merca por contribuír coa merenda e os carteis