“Impás”: circo contemporáneo e poesía que emocionaron en Zarracós

Un espectáculo con numerosa participación e unha sentida homenaxe aos incendios que asolan Ourense

O pasado xoves 21 de agosto ás 20:15 horas, o campo da festa de Zarracós transformouse nun escenario máxico coa performance “Impás”, creada e interpretada por Cristina Solé, Nuria Rodríguez e Alba Núñez.

A cita contou cunha gran participación de público, que se achegou para vivir unha proposta de circo contemporáneo e poesía na que corpo, palabra e memoria se entrelazaron para suspender o tempo por un intre. Entre acrobacias, xestos e versos, os asistentes deixáronse levar por unha experiencia escénica íntima e colectiva que convidaba a parar, respirar e sentir.

Finalizada a actuación, chegou o momento máis emotivo da tarde. As intérpretes fixeron unha homenaxe simbólica aos incendios forestais que estes días están a asolar a provincia de Ourense. O xesto tivo unha especial carga emocional ao saber que Alba Núñez é natural de Chandrexa de Queixa, un dos territorios máis duramente golpeados polas lapas. O público acolleu a escena cun silencio profundo e respectuoso, seguido dun longo aplauso cheo de agarimo e solidariedade, que puxo o broche final a unha velada inesquecible.

Dende aquí queremos dar as grazas de corazón a Cristina, Nuria e Alba, que de forma totalmente altruísta nos regalaron un espectáculo cheo de arte e emoción, facendo que Zarracós vivise unha tarde inesquecible.