O Concello da Merca arranxa as inmediacións da fonte de Salpurido

Nas últimas semanas, operarios da brigada de obras do Concello da Merca acometían diversas melloras nas inmediacións da Fonte de Salpurido. En liñas xerais o que se fixo foi arranxar varias fochancas que había no pavimento xa existente, cementar ó redor do tanque de regar e acondicionar e limpar o tanque de lavar.

Unha pequena intervención, que sen dúbida, constitúe unha mellora para a veciñanza do lugar e da contorna, se ben é certo que dende a asociación de veciños sempre demandamos (tanto á alcaldía como ó resto de grupos políticos presentes no concello) que se arranxaran as fontes empregando criterios de intervención sobre o patrimonio, eliminando traballos e materiais non axeitados e usando outros materiais máis acordes coa paisaxe, como por exemplo: pedra, lastros de pedra, ...