XXIV Xantar Popular do San Ceriz 2023: unha boa comida como pretexto para xuntarse

Preto de 100 persoas se animaron a participar desta nova edición

Paseniñamente as celebracións van recuperando a súa esencia, e o certo é que aínda non se recuperaron os niveis de participación previos á pandemia, pero xa estamos moi preto, pois case un cento persoas se reuniron o pasado domingo 18 de xuño no campo da festa de Zarracós para celebrar o tradicional Xantar Popular do San Ceriz, que xa ten no seu haber 24 edicións, que si di pronto.

Cabe destacar que non foi nada sinxelo organizar este xantar popular dado que houbo que movelo de día por mor da celebración do 56 Rallye de Ourense e a maiores o prezo por comensal subiu de xeito considerable ata os 30€, algo que nunca soe gustar, pero a pesar de todos os pesares todo isto non lle restou as ganas de participar e reunirse en irmandade  á veciñanza da parroquia de Zarracós, algo que ven a demostrar que formamos parte dunha gran comunidade.

 Así, tal e como ven sendo costume a xornada festiva daba comezo ás 12.30 da mañá co repique de campás (grazas Antonio e Izan) e a posterior misa na honra ó San Ceriz, este ano non houbo procesión. Con respecto a isto tamén queremos destacar o importante traballo levado a cabo pola veciñanza nos días previos para axeitar tanto o interior como o exterior do templo, así como a importante labor realizada por aquelas mulleres que sempre se encargan de ter a igrexa nas melloras condicións e perfectamente adornada. Bravo por todas estas persoas!!

Cumpridos os preceptivos actos relixiosos tocaba dirixirse ata o Outeiro para desgustar un tradicional menú á feira: empanada, polbo á feira, carne ó caldeiro con cachelos, bica, viño, auga, refrescos, café e licores varios. Un completo e farturento menú que de seguro que deixou satisfeito ós máis exquisitos padais. Así coa barriga ben chea tocaba animar a sobremesa e niso o mestre Bieito Blanco é un auténtico especialista, pois non tardou en votar man do acordeón e tocarlle unhas pezas, pero a cousa non quedou aí e logo se uniron as pandeiretas para así seguir cantando e entoando cancións tradicionais entre todo público presente. E como non, tamén houbo tempo para animadas conversas e para xogarlle unha partidiña ás cartas.

Dende a asociación de veciños agardarmos que a celebración fose de gusto de todas aquelas persoas que se animaron a asistir e ogallá o vindeiro ano poidamos celebrala de novo. Polo de pronto aquí vos deixamos uns vídeos e unhas cantas fotografías.