Punto de Lectura no Palco da Música

Un dos proxectos que puxemos en marcha este ano con motivo do noso 30 aniversario foi a creación dunha Ludobiblio no Palco da Música. Pois ben, esta ven de acadar estes días a nada desprezable cifra de 500 libros catalogados grazas a unha das últimas doazóns que recibimos da excelentísima Deputación de Ourense a semana pasada.

Así, e nunha aposta decidida por facer medrar esta iniciativa cultural e continuar facilitando a hábitos de lectura á veciñanza e a todas aquelas persoas que se acheguen ata o campo da festa de Zarracós, agora vimos de por en marcha un Punto de Lectura.

Esta idea non é nova nin moito menos, de feito é bastante popular nos parques dalgunhas cidades e vilas, non así en concellos pequenos como o noso. En que consiste? Pois ben, no palco da música toparedes un pequeno armario branco no que sempre estarán dispoñibles un máximo de 10 títulos, poderedes levalos en préstamo e devolvelos cando rematedes a lectura, ou ben darlle unha lectura mentres estades neste fantástico espazo de lecer como é o campo da festa.

A continuación deixámosvos as normas que rexerán o uso deste Punto de Lectura e que son bastante sinxelas.

NORMAS PUNTO DE LECTURA

1. No Punto de Lectura poderás atopar unha pequena selección de libros que iremos cambiando de xeito periódico.
2. Os libros que podes atopar no Punto de Lectura pertencen á Ludobiblio e polo tanto son de todos co que debemos coidalos e respectalos.
3. Podes coller o libro que desexes en préstamo e devolvelo ó Punto de Lectura unha vez  que finalices coa súa lectura.
4. Podes doar os libros que consideres oportunos para a Ludobiblio deixándoos no Punto de Lectura, ten en conta que non aceptamos: dicionarios, libros de texto ou enciclopedias.