A parroquia de Zarracós inaugurou o mural do palco da música cunha fermosa e emotiva celebración

O pasado sábado, 11 de marzo de 2023, tivo lugar a festa de inauguración do mural do palco da música. Unha fermosa e emotiva celebración que congregou a numeroso público no campo da festa da parroquia de  Zarracós.

Esta daba comezo  pasadas as cinco da tarde coa intervención da nosa veciña e artista creadora do mural: Ivette Bordera, quen se dirixiu ó público presente en perfecto galego (destacar que ela é de orixe catalán, polo que ten moito mérito) para dar as grazas pola excepcional acollida que tivo no pobo, así como, por darlle a suficiente confianza e liberdade para poder crear dito mural. Tamén, aproveitou a ocasión para “despedirse” da parroquia, posto que en breve se mudará ó Concello de Lobeira na Baixa Limia, pero que continuará participando como se fose “unha filla máis de Zarracós”.

Seguidamente, tomaría a palabra o secretario da asociación de veciños, para expresar a enorme gratitude da parroquia por un agasallo tan xenial como o mural, pondo tamén en valor a elección daquelas persoas que decidiron trasladarse ó rural, integrarse dende o primeiro momento e  pasar a formar parte dunha comunidade viva como son os pobos e aldeas,  algo que non todos souberon entender.

A continuación, chegaría un dos momentos máis emotivos da tarde, cando Cristina Calle (Profesora de canto e pandeireta) lle entregaba a Ivette un obsequio realmente especial en nome de toda veciñanza, un retrato pintado con acuarela pola nosa veciña Mary (Maricarmen Peña), por iso,  dende aquí queremos expresarlle o noso máis profundo agradecemento por realizar de xeito altruísta unha obra de arte tan fermosa.

Despois de soltar unhas vágoas de emoción, o secretario continuaría relatando a razón de ser do mural, que pretende ser unha homenaxe ós antepasados, a esas persoas que tanto traballaron de sol a sol, sen descanso para chegar ata onde estamos. E finalizaría explicando as distintas labores do ciclo do pan, traballos que formaban parte da vida cotiá da veciñanza.

O toque festivo a esta celebración poríao o Grupo de Canto e Pandeireta, interpretando de xeito “teatralizado” unha escolma de cancións relacionadas coas distintas labores do campo e rematando con parte do público subido ó palco da música para cantar todos a unha “Este cantar da vendima”.

Pero o conto non quedou aí, de seguido o gran mestre Bieito Blanco, votou man do acordeón e amenizou a tarde de xeito maxistral, tal e como nos ten acostumados.

Mentres, cunha cámara instantánea, todas aquelas persoas que así o desexaron puideron facerse fotografías coa protagonista do evento (Ivette) ó carón do mural, ou onde desexaron. Estas fotografías pasarán a formar parte dun álbum de agasallo para ela, un pequeno recordo do seu paso pola nosa parroquia.

Como broche de ouro, tocaría merendar todos xuntos no local sociocultural, e abofé que había comida dabondo, foi suxerir á veciñanza que cada un achegase algo de comer, e como se soe dicir, meu dito meu feito, varias mesas repletas de comida nas que non faltaba de nada: bica, orellas, empanada, patacas fritas, tortilla, embutidos, queixo, pan, pizza, viño, cava, refrescos, chocolate, galletas,... un auténtico festín.

Finalmente, aínda houbo tempo para improvisar unha queimada (co seu correspondente conxuro) entre os poucos que resistiron ata o final de todo.

Dende a asociación de veciños non podemos máis que sentirnos orgullos da gran veciñanza que forma parte da nosa parroquia e como non dar as grazas a Ivette, Cristina Calle, Maricarmen Peña, Maika, Carlos, Bieito Blanco, Grupo de Canto e Pandeireta e a toda veciñanza en xeral por facer posible unha festa tan sentida e agarimosa.