O 58 Rally de Ourense cruzou a parroquia de Zarracós por cuarto ano consecutivo

O Rally de Ourense segue consolidando o seu paso pola parroquia de Zarracós, e con esta edición do 2025, xa van catro anos consecutivos nos que o trazado inclúe este fermoso recuncho do sur ourensán. A cita tivo lugar o venres 13 de xuño, dentro do tramo A Merca – Celanova, un dos máis espectaculares e agardados polos afeccionados locais.

A pesar de celebrarse en día laborable, foron numerosos os veciños e seguidores do motor que se achegaron aos puntos máis emblemáticos da parroquia —como o campo da festa, a baixada da Trina ou o cruce das Santas— para desfrutar do espectáculo sobre rodas que cada ano esperta máis paixón en Zarracós.

Nesta ocasión, todo transcorreu sen incidentes na parroquia, cun ambiente cheo de emoción e moita animación tanto na pasada da tardiña como na da noite. A seguridade, a boa organización e o civismo foron protagonistas xunto co rugido dos motores.

No plano deportivo, o protagonista absoluto foi o piloto ourensán Javier Pardo, que se impuxo con autoridade ao volante do seu Skoda Fabia RS Rally2, conquistando a vitoria da proba e facendo soar con forza o nome da provincia. A nota negativa da xornada foi o accidente de Cohete Suárez, que se viu obrigado a abandonar tras unha saída de pista, deixando así fóra da loita a un dos grandes favoritos.

En definitiva, Zarracós viviu unha xornada inesquecible, onde o motor, a emoción e o orgullo local volveron darse a man. Deixámosvos aquí unhas imaxes e vídeos para revivir esta festa do rally que, ano tras ano, gaña forza na nosa parroquia.